قصائد من دفاتري الخاصة

والله شاعر حقيقتا ياحاتم بس اتمني انك تنزل كل قصايدك في المنتدي...

وياخليفه ليش عجبك البيت ده بالذات..

شيخ القمر
{الجزء الأول}
الضل رمي والحاج يكورك للفطور:
ياحاجة لسة ماأنتهي؟
: "ياشيخ قمر مالك بقيت كوراك ماكنت خابراك سعجيلا كدا يادوبو ختيتها الحليلي علي الوقود"
الحاج خلاص نفسو أنقطع ... غلبو الكلام أتمحن الشقي في الوطا..
وقال: ياالله صبرك يارضي
خت الأبيرق منتظر جية الفطور
:"ياحاجة لسة ماجهز؟"
الحاجة ماردت عليهو صوت الفرك في الويكة يادابو أنتهي
والقحة تطلع من خشيمها مع الحطب
:"الساعة واحدة وشيخ قمر ياحاجة لسة مافطر!؟" الحاجة شامة قالتلها الحكي...
تاوقت شافت الشيخ منتظر
قالتلو:" هوي.... هوي قمر جاك السلام"
الشيخ مدندن ماسمع..
:" خبارو ياحاجة القمر!؟"
قالتلها: سيبيهو ياشامة إنظلم; الشيخ قمر لي يومو دا لا شاف قروش لا ادوهو ناس الدين قروشو الدايرة ، يصحي ويقوم الساعة خمسة من الصبح بقي لابصلي صلاتو ديك ولابغسل وشيهو من القضا حالو ياشامة إنكرب
بقي زي العجوز المخرف وإنتهي.."
والحاج يكورك: ماأنتهي!!؟
الحاجة شالتلو الصحين
العصيدة في ربع الصحين
الملاح أبيض مسيخ لابصل لا لحم
غير الملح والويكة عدمان الطعم
ختتلو قدامو الاكل...
قالتلو:" سمي ياشيخ القمر"
الشيخ قمر مد الأصيبعات في الصحين
اللقيمة الأولي تف
اللقيمةالتانية تف
اللقيمة التالتة مجبورة النفس مجبورة تاكلها تبلعا
والشيخ قمر حمد الله تب وقال للولية الفي التكل :" حاجة الرضية عليك الله الشاي معاك"
حاجة الرضية داسالها حبة سكرة
في توبها صاراها الحنينة عارفاها الظروف خاتاها للضيف البجي...
قالتلو:" حاضر يا السمح"
قاليها:" أنت الحاجة شامة مي كانت هني!!؟ واللا أنا سمعت صوتا زيها"
حاجة الرضية ختت أيديها في جبهتها وقالتلو:" هي يا الحاج قمر أنا مانسيتها مع الفطور!!؟
والحاج ضحك رغم التعب
تكل الرويس في العنقريب
قال: يالطيف سترك علي يا الله تديني القروش يا الله تديني القروش....)

والنومة شالت شيخ قمر حلمانلو بي زولا كبير مليان رزم
قال للقمر: هاك ياقمر تستاهل المال ياتقي..

الشيخ قمر
{الجزء الثاني}
الشيخ قمر بقي يتشابي للزول والقروش وقالو: جاي.. جاي ياسيدي.
الزول ضحك :" أنا سيدك؟!
قالو: أي بلحيل سيدي وسيد سيدي "
: لكن عليك شرطا تقبلبو يا شيخ القمر أمسح جزيمتي من الوسخ"
الشيخ قمر لا قالو لا لا قالو أبيت هين رضخ
الشيخ قمر مسح الجزيمة من التراب
الزول ضحك ورفس القمر لمن وقع وشاف النجوم نزلن قراب قاليهو: هوهو يا القمر قول كلب القمر قول طيرة القمر قول كفر القمر"
الشيخ قمر شايف القروش كيفن يصم خشمو ويصن...
الشيخ بكي لاكنو صبران شان قريشات دايرا وشان غلب...
الشيخ بكي متحمل الذل شان الرضية الدايرة حق السكر الويكة العدم
رضيان عشان الناس بقت في همها وماماخدة بي خبرو الخبر
وعضاها سبابة الندم
أي زول في حالو بس
أي زول مسكين فقير لازم يجوع
أي زول تعبان هنا لازم يموت
ومافي زول قشاش دموع
التماسيح ست البلد
الفراش يانا الغلابة الزيهم
وزغرودة للزول الشرد
ليهو حق يرضي الهوان
ليهو حق يلحس جزم ويندق بالسوط
في القفا
الناس بتشتري بالقروش
والناس بتتباع بالقروش
مسكين قمر
ينزل عشان يلقي القروش
ماهي القروش بقت السبب
بقت السادة والسيد والرئيس
العالي بركب أي زول زي الحمير
لازول بقول يا خينا لا لازول بقول ياناس كفي الزول كبير
عندك قروش تصبح ملك
فقران وعدمان القروش حرم علي النعمة ماك ود الحلال
والنباح بهوزز ضنبو للزول الملك
السكوت بقي بالقروش
والكلام بقي بالقروش
بالخلق البشر والحق تقول:
كم من قمر مات بالعطش؟ حرم تقول
كم من قمر ساقوا الجيوش كتلوا بعيد؟ حرم تقول
كم من قمر طردوهو من المدرسة؟
حرم تقول
كم من قمر فصلوهوا مس جامعتو كم؟ حرم تقول
كم من قمر جلدهو في كلمة صدق؟ حرم تقول
كم من قمر مالاقي حق الويكة بس؟ حرم تقول
الوجوه الحلوة ظاهرة الأيادي الناعمة نائمة والأيادي الخشنة ساهرة
في الحروب ناسا تداس
وفي القصور أحلي الأناث
المشاوير مارسيدس الحدائق والجناين والمدارس جيب ولانسر
الجامعات في أوربا بس وزاد الفقير لالوب عدس
ليهو حق الشيخ قمر يبكي ويعيش
الدنيا زاتها بقت كدا
شيخ القمر حال المراح السيدو راح
شيخ القمر زول زيو كم؟
لوداير تكون مازي قمر ربي الدقينة وكبرها شيل سبحتك كبر بطينتك وشحمها أفلق جبيهتك بالصلاة تبقي الكبير
البلد دايرة الكبير
وزي القمر الله أعلم برضي زول
والدمعة تنزل في الحصير
والجمل ماش في المسير
ونحن خوفنا من المصير

الشيخ قمر
{الجزء الثالث}

الحالة....
الحالة حالة شعب رضيان بالهوان
رضيان يعيش بي همو بس
أي واحد نفسو بس
الفقر... عيشة الكلاب تتجاري لي عفن اللحوم
الفقر... طعم النسور الكائسة للجيف والفطيس
الفقر.... حال الضباع الجائعة شمامة الدموم
الفقر.... حال الشعوب الزينا
الدين لعب صلاتنا لي الله الكضب
ركعاتنا للناس الحلال
الكروش مليانة بي حق البلد
ناس تكابس للفطور
وناس هناك فوق القصور تمتلك أغلي العطور
الناس هناك تشرب الشاي باللذيذ
تأكل مع الشاي الفطير تأكل كعك تأكل عنب
والشيخ قمر مالاقي شئ
تشرب عصير تمضغ لبان تأكل سمك والشيخ قمر مالاقي شئ
تلبس حرير تلبس سيوتر من برد
والشيخ قمر مالاقي شئ
تركب سفن تركب حصين تركب جديد لنج الحديد
والشيخ قمر مالاقي شئ
وليهو حق مايلقي شئ
ماعلم النفس التدني للرجال
ماعلم القلب مايقوي تب
ماعلم العين ماتشوف
ماعلم الليدين تسلم للكفوف
تمسح جزم
والشيخ قمر لابحس ولابشوف العوج
والقمر يصرخ ويقول للناس:" شن يسوي للفوق القمر أمانة ياناس ما أنضبح أمانة مامات القمر!!
_ياشيخ قمر خليك زولا ليهو ضل
ماتتابع الناس في الكلام ماتبقي قوالا شديد
خليك زولا من حديد الأرضة ماتجيبلك خبر
إنت زولا من لحم.. واللاماك عارف اللحم!؟
إنت زولا من عضم .. واللاماك عارف العضم!؟
إنت زولا من تراب واللاماك عاا..... والله بتعرفو التراب وشوف الرهاب والضحكة في عز العذاب
ياشيخ قمر...
صلي لي الله الكريم يعمنا الخير في البلد
ياقمر...
والله دعوة كل مظلوم ليها رب
وإنت مظلوم ياقمر
أدعو الله يفك كربتك
أدعو الله يشيل محنتك
أدعو الله يعافي بدنك
أدعو الله يعافي دينا الانسرق
وصية ياالقمر أسمعها كان جيت تقول أسم الظلم لي الله قولو وأكتمو السر أمان .. المفتش في القطر والناس تخاف..
والقمر صحي منخلع والشاي برد والساعة بقت عصير
والحاجة نائمة من التعب
من الفرك من الحطب
نست الغدا ونست الصلاة
والخوف تكون حلمانة بالشافو القمر
ياريت تكون شايفالها في النومة الفرج
ووين الفرج ياحاجة بس
جوة السجن مساكين ليهم الله
السارق العيش أنسجن
السارق التوب من برد السارق البصل انسجن
السارق الخيت إنسجن السارق الأبرة انسجن
وكم ناس هناك ناس عائشة كيف بائعة القروش سافة الخلق داسة الرزم فوق المصارف والبنوك
وناس الجمرة شايلاها وتلوك ناس شايلة حق الناس غصب ناس بتعرف للكضب الله قال ورسولنا سوي
والجمل عاجباهو روحو
أف عليك ياراعي ودرت الغنم ضيعت حق الناس معاك
الكضب حبلانو جارات بي وراك وماطوال
لكن علي الشعب انجبر
ناس تئن ناس الوباء بينها أنتشر
تصرخ تقول يا الله لي
الراعي بي روحو أنشغل
والناس هناك كاتمة الخبر
ياالله جيب لينا الفرج
يا الله جيب لينا الفرج
****************

{يابت ياسحاب}
[center]
يابت ياسحاب ياشائلة مطر
ياآسرة قلوب الناس وبشر
يا عائشة هناك موزعة بين أنهار وبحر....
سحرتي عيونا في الليل وسحر
لا إنت بشر لاملاك لاقمر..!
ماأظني أنا المسكون بالشوق أقدر
أشرح سر الروح الفيك ظهر
مابينك وعشق الجنة شبر
لا قادر أصلك ولقلبك أصل
أصلا أنا المفتون بالحاجة الفيك
الما مفهومة شنو
الجذبتني اليك
وخلتني أسير....
وأنا الحرمت الحب من بدري وقلت كتير..
كتير أتحرق قلبي زمان ياأمير
تصدق داير إنت تعذبو تاني
وأبكي كتير
فكر فيني عشان ما أغرق
لكني بخاف لا تحس لا تبقي سمير
يا حنين.. خليك حنين حبة
مد أيديك لي زول إتنفس حبك ليل وعصير.
أنا المسكين المالاقي حنانك جنبي
معقول تمليهو قليبي ويحبك غير دمنا واحد جدنا واحد حبنا واحد
أكيد أولاهم أنا والله أكيد
كنت معاك بس لدقائق إتمعنت ملامحك جنبي تقولي ملاك
أتحسست أناملك بفؤادي
فردت هواي وقلت هواك
عمرك كلو أنا ماشفتك ومما شفتك
حسيت ياغالية معاك
صوتك عذب قلبي ياسمرا وأنا الاسمر
يا أنت ياروحي فداك.....

[center]

الحزن أنت والدموع أنا

الحب جهرا

ماشاء الله ياحاتم لكن نصيحه ليكم بخروا المنتدي من عيون الناس .
ابداع..

ماشاء الله ياحاتم لكن نصيحه ليكم بخروا المنتدي من عيون الناس .
ابداع..